Në veprën e tij “Dictionarium latino-epiroticum” (Fjalor latinisht-shqip) shkruar më 1635 në Romë, shkrimtari shqiptar Frang Bardhi (1606-1643) na jep disa të dhëna tepër interesante për Gjergj Kastrioti Skënderbeun
Në pjesën e nënvizuar mund të lexoni që Frang Bardhi thotë se Gjergj Kastrioti nga shqiptarët është thirrur si “Culçeedra e Arbenit” (Kulçedra e Arbënit) që në latinisht ai e përkthen si “Epiri Draco”.
Në pjesën më poshtë, shkruar në shqipen e vjetër, Bardhi na jep disa të dhëna për vendlindjen dhe për një emër tjetër të Skënderbeut, me të cilin shqiptarët ndoshta e njihnin si emrin e tij të dytë. Bardhi shkruan:
“Croia, Cruia Vendi qu ka leem edalë aio Culçedra e botëssë Arbenit, Giec, oò Gierg Castrioti ξanë, e ξirrë Scanderbegh”
Nuk besojmë që keni ndonjë problem për ta kuptuar pasi shqipja nga ajo kohë nuk ka ndryshuar gati se aspak, por ne do ‘përmisojmë’ gramatikën e tekstit dhe në shqipen e sotme:
“Kroja, Kruja Vendi ku ka le e dalë ajo Kulçedra e botës së Arbënit, Gjec, ose Gjergj Kastrioti, thanë, e thirrë Skanderbegh”
Është interesant që për vendlindjen e Skënderbeut, Bardhi vendos Krujën, por vendlindja e Gjergjit është e diskutueshme, ku një pjesë e historianëve vendosin Krujën, Dibrën, Matin, Sinjën, etj, si vendlindjen e Skënderbeut, të gjitha këto ishin toka që sundoheshin nga Kastriotët në kohën kur lindi Gjergji (pra në vitin 1405), ndërsa një informacion tjetër që Frang Bardhi na jep, është së përveç emrit Gjergj, Skënderbeu ndoshta njihej dhe me emrin “Gjeç” nga shqiptarët, por të dhëna për këtë nuk kemi, kështu që nevojiten më shumë hulumtime për këtë çështje.
