Vaksina e parë në botë që mund ta trajtojë kancerin vdekjeprurës të trurit, potencialisht ka gjasa t’ua shtojë pacientëve disa vite jetë, ka nxjerrë si përfundim një provë klinike globale.
Një mjek i cili ishte një nga hetuesit kryesorë të provës, tha se provat treguan se vaksina DCVax kishte rezultuar me mbijetesë të rritur “të habitshme” për pacientët.
Nga zbulimi mund të përfitojnë 2,500 njerëz në vit në Mbretëri të Bashkuar, të cilët diagnostikohen me glioblastoma, forma më e zakonshme e kancerit të trurit dhe gjithashtu një nga më agresivet. Njerëzit me këtë sëmundje jetojnë mesatarisht vetëm 12-18 muaj pas diagnozës, disa edhe më pak.
Një pacient i cili ishte i përfshirë në studimin global me 331 persona, jetoi për më shumë se tetë vjet pas marrjes së DCVax. Në Britani, 53-vjeçari Nigel French është ende gjallë shtatë vjet pasi e ka marrë vaksinën, raportoi The Guardian, transmeton Koha.net.
“Rezultatet totale janë të habitshme. Rezultatet përfundimtare të kësaj sprove të fazës së tretë ofrojnë shpresë të re për pacientët që luftojnë me glioblastomën”, ka thënë profesori Keyoumars Ashkan, një neurokirurg në spitalin e King’s College në Londër, i cili ishte kryehetuesi evropian i provës.
“Vaksina rezultoi se ua zgjaste jetën, dhe interesant është kështu te pacientët që tradicionalisht konsiderohen të kenë prognozë më të dobët, si psh njerëzit e moshuar dhe njerëzit për të cilët operacioni nuk ishte një opsion”, shtoi ai.
Nëse miratohet nga rregullatorët mjekësorë, DCVax do të ishte trajtimi i parë i ri në 17 vjet për pacientët me glioblastoma të sapodiagnostikuar, dhe i pari në 27 vjet për njerëzit në të cilët ishte kthyer.
Studiuesit e provës zbuluan se pacientët e sapodiagnostikuar që kishin vaksinën mbijetuan mesatarisht 19.3 muaj, krahasuar me 16.5 muaj për ata që morën një placebo.
Pjesëmarrësit me glioblastomë të përsëritur që kishin pasur DCVax jetuan mesatarisht 13.2 muaj pas marrjes së tij, krahasuar me vetëm 7.8 muaj për ata që nuk e kishin bërë.
Në përgjithësi, 13 për qind e njerëzve që e morën atë jetuan për të paktën pesë vjet pas diagnozës, sipas rezultateve të provës, të cilat u publikuan të enjten në Journal of the American Medical të Shoqatës së Onkologjisë.
Vaksina është një formë imunoterapie, në të cilën sistemi imunitar i trupit është i programuar për të gjurmuar dhe sulmuar tumorin. Është i pari i zhvilluar për të trajtuar tumoret e trurit.
“Vaksina funksionon duke stimuluar sistemin imunitar të pacientit për të luftuar kundër tumorit. Ai ofron një zgjidhje të personalizuar, duke punuar me sistemin imunitar të pacientit, i cili është sistemi më inteligjent i njohur për njeriun”, është shprehur Ashkan.
Ai ka treguar mënyrën se si funksionon vaksina.
“Vaksina prodhohet duke kombinuar proteinat nga tumori i vetë pacientit me qelizat e bardha të gjakut. Kjo i edukon qelizat e bardha për të njohur tumorin. Kur vaksina administrohet, këto qeliza të bardha të arsimuara më pas ndihmojnë pjesën tjetër të sistemit imunitar të pacientit të njohë tumorin si diçka që duhet ta luftojë dhe shkatërrojë. Është pothuajse njëjtë si të stërvitësh një qen nuhatës”, ka shtuar Akshan.
Vaksina nuk është ende e disponueshme por Northwest Biotherapeutics, kompania amerikane që e prodhon atë, planifikon të kërkojë miratimin rregullator që të mund të bëhet e disponueshme.
