Si sot, në vitin 1878 Kongresi i Berlinit ka përfunduar punën e tij. Kongresi është thirrur zyrtarisht nga Ministri i Jashtëm austriak, Konti Gyula Andrassy. Për rezultatet e Kongresit të Berlinit, Carlton J.H. Hayes, presidenti i Shoqatës së Historianëve Amerikanë, deklaronte se, “Para vitit 1878 kishim ‘Çështjen Lindore’ të një ‘të sëmuri’ [Perandoria Osmane] dhe pas vitit 1878 përfshiu gjysmë duzinë maniakësh sepse Kongresi i Berlinit e çoi Ballkanin në çmenduri”!
I dominuar nga kancelari gjerman Otto von Bismarck, Kongresi zgjidhi një krizë ndërkombëtare të shkaktuar nga Traktati i Shën Stefanit duke rishikuar zgjidhjen e paqes për të kënaqur interesat e Britanisë (duke mohuar Rusinë një fuqi detare dhe duke ruajtur Perandorinë Osmane si një fuqi europiane), si dhe për të kënaqur interesat e Austro-Hungarisë (duke e lejuar atë të pushtojë Bosnjën dhe Hercegovinën dhe kështu të rrisë ndikimin e saj në Ballkan). Duke vepruar kështu, megjithatë, Kongresi e la Rusinë të poshtëruar duke zvogëluar ndjeshëm fitimet që kishte bërë nën Traktatin e Shën Stefanit. Për më tepër, kongresi dështoi të merrte në konsideratë në mënyrë adekuate aspiratat e vetë popujve ballkanikë dhe kështu vendosi bazat për krizat e ardhshme në Ballkan.
Në këtë kontekst, ishte themeluar Lidhja e Prizrenit, organizata e parë nacionaliste shqiptare në Kosovë dhe zonat fqinje, e themeluar në Prizren. Në asamblenë e saj të mbajtur më 10 / VI / 1878, Lidhja e Prizrenit me kërkesat e saj të mbështetura fillimisht nga Perandoria Osmane, u përpoq të ndikonte në Kongresin e Berlinit, i cili po formulonte një zgjidhje paqeje pas Luftës Ruso-Osmane (1877-78) dhe që kërcënonte për të ndarë Shqipërinë (atëherë pjesë e Perandorisë Osmane) dhe transferimin e disa prej territoreve të saj në Mal të Zi, Serbi dhe Greqi!
Marrë nga Jahja Drancolli, profili në FaceBook, postuar më 13/07/2021. /InforCulture.info
