Historia është e mbushur me mallkime që kanë shkaktuar tragjedi e fatkeqësi të shumta. Këto mallkime normalisht i atribuohen fatit të keq, por shumë prej tyre janë mjaft të çuditshme dhe tërheqin vëmendjen në një mënyrë të pashmangshme. I tillë është mallkimi që ka prekur familjen Kennedy, atë Hemingway, mallkimi i Supermenit etj.
Klubi 27, i cili njihet gjithashtu si “Forever 27 Club” është një emër popullor për një grup muzikantësh rrok dhe xhaz me influencë, të cilët u ndanë nga jeta të gjithë në moshën 27-vjeçare, nganjëherë në rrethana misterioze. Ka debat mbi kriteret e përfshirjes së personave në Klubin 27. Impulsi për krijimin e Klubit ishte vdekja e disa muzikantëve të shquar 27-vjeçarë në një periudhë dy-vjeçare. Lista përgjithësisht përfshin Hendrix, Morrison dhe Joplin. Më vonë është përfshirë dhe Cobain e Amy Winehouse.
Këta janë disa nga këngëtarët e famshëm që vdiqën në moshën 27-vjeçare:
Jim Morrison. Për solistin e grupit të njohur “The Doors” u tha se kishte pësuar sulm në zemër, por autopsia nuk iu bë asnjëherë. Por mendohet se Morrison vdiq nga një mbidozë heroine.
Jimi Hendrix – Kitaristi më i mirë të gjitha kohërave vdi1 nga mbidoza dhe alkooli.
Janis Joplin – Këngëtarja e njohur e viteve ’70 vdiq nga përdorimi i tepërt i heroinës.
Kurt Cobain – Solisti shumë i njohur të grupit “Nirvana”, bëri vetëvrasje në shtëpinë e tij në Seattle.
Amy Whinehouse – Këngëtarja u gjet e vdekur në shtëpinë e saj më 23 korrik 2011 në Londër. Shkaku i vdekjes doli të jetë helmimi nga alkooli.
Mallkimi i Tutankhamenit
Disa muaj pas zbulimit të varrit të Tutankhamenit nisi tragjedia. Lord Carnavon (investitori i kërkimeve) 57 vjeç, u sëmur dhe u dërgua në Kajro, ku vdiq disa ditë më vonë. Djali i tij tha se në Angli, qeni i tij i preferuar hungëriu në oborr e pastaj ngordhi. Në vitin 1929, njëmbëdhjetë persona që kishin lidhje me zbulimin e varrit vdiqën para kohe dhe nga shkaqe jo natyrore. Këto vdekje përfshinin dy të afërm të Carnarvon, sekretarin personal të Carter, Richard Bethell dhe babain e tij Lord Westbury, i cili u vetëvra duke u hedhur nga një ndërtesë.
Mallkimi Kennedy
Familja Kennedy mishëron çdo skaj të mallkimit të supozuar, nga koincidenca deri tek fati i keq dhe mundësia “imagjinare” se një forcë jo e kësaj bote po punon kundër tyre.
Është kurioz fakti se senatori Ted Kennedy është shprehur në një rast se ekziston mundësia e një mallkimi mbi familjen.
Duke filluar që prej vrasjes së Xhon F. Kenedi, ngjarje të tjera fatkeqe i janë atribuar “mallkimit” duke përfshirë këtu dështime, goditje, mbidozë, kancer, vdekje nga aksidentet ajrore, vetëvrasje dhe tragjedi të tjera të evitueshme, në të cilat anëtarë të klanit Kenedi kanë vdekur aksidentalisht, vrarë apo nga neglizhenca.
Brezat e mëvonshëm: Në vitin 2006 kongresmeni Patrik Kenedi përplasi makinën ndërsa kishte marrë lëndë narkotike. Babai i tij, Ted Kenedi, i kishte mbijetuar një aksidenti ajror, një mbytjeje në ujë dhe në vitin 2006 avioni me të cilin udhëtonte u godit nga rrufeja.
Familja Heminguei
Po të hedhësh një vështrim mbi familjen Heminguei vërehet me lehtësi “mallkimi” klinik: Depresioni i thellë.
Në moshën 29-vjeçare karriera letrare e Ernest Hemingueit po fillonte të ecte me shpejtësi, kur babai i tij vrau veten. Ernest Heminguei fitoi një çmim “Nobel”, “Pulitzer” dhe famë ndërkombëtare. Sidoqoftë, kjo nuk ishte e mjaftueshme që ai të zgjidhte të jetonte, duke i dhënë fund jetës me një armë “Shotgun” në moshën 62-vjeçare.
Pesë vjet pas vetëvrasjes së Ernest Hemingueit, motra e tij Ursula, e cila luftoi me kancerin dhe depresionin, kreu vetëvrasje me anë të një mbidoze. Gjashtëmbëdhjetë më vonë, vëllai i vetëm i Ernestit, Leicester, vrau veten me armë zjarri, pasi mori vesh se do humbiste dy këmbët për shkak të diabetit. Dhjetë vite më pas, mbesa 35-vjeçare u zhyt në depresion dhe mori mbidozë ilaçesh.
Brezat e mëvonshëm: Nga pasardhësit e Ernest Heminguei jeton mbesa e tij e njohur, Mariel, e cila ka dy vajza, Dree Louise Crisman dhe Langley Crisman.
Diamanti Hope
Diamanti Hope daton në vitin 1642 dhe është i famshëm për ngjyrën e thellë, masën, qartësinë, bukurinë dhe historinë që mban. Ai thuhet se sjell fat të keq tek kushdo që e mban atë. Sipas një legjende, një person me emrin Tavernier bëri një udhëtim në Indi dhe atje e vodhi diamantin nga statuja e perëndeshës Hindu, Sita. Pas kësaj, Tavernier u shqye nga qentë e egër gjatë një udhëtimi në Rusi. Mbreti Luixhi XVI, i cili e kishte diamantin u dënua me prerje koke bashke me gruan e tij. Askush nuk guxon ta mbajë më diamantin, por ai iu dhurua institutit “Smithsonian”.
Mallkimi i Supermenit
Mallkimi i Supermenit i referohet fatkeqësive që u kanë ndodhur njerëzve të përfshirë në historinë e Supermenit në vite. Dy njerëzit më të famshëm të prekur nga ky mallkim janë George Reeves, i cili interpretoi personazhin në seritë televizive dhe Christopher Reeve, i cili ishte në rolin e Supermenit në filmat e fillimit. George Reeves kreu vetëvrasje ndërsa Cristopher Reeve u paralizua pasi ra nga kali. Për shkak të këtij mallkimi shumë aktorë kanë refuzuar të interpretojnë rolin e Supermenit.
Mallkimi Bambino
Mallkimi i Bambinos i referohet fatit të keq që ndoqi skuadrën e bejsbollit “Boston Red Sox” pasi i shiti lojtarin Babe Ruth skuadrës “New York Yankees” në vitin 1920. Deri në atë kohë “New York Yankees” nuk kishin fituar asnjëherë në “World Series” dhe shpresonin se Ruth do i ndihmonte në këtë, dhe ai i ndihmoi në fakt. Pas shkëmbimit “Boston Red Sox” nuk fituan më asnjë kupë deri në vitin 2004. Gjatë lojës së tyre fituese ndodhi një eklips i plotë hënor. Ajo çfarë ishte akoma më e çuditshme është se jo ndeshje ishte kundër skuadrës “New York Yankees”.
Porshi i James Dean
Më 30 shtator 1995 aktori i famshëm James Dean humbi jetën në një aksident automobilistik me makinën e tij “Porsh Spyder”. Pas tragjedisë George Barris e bleu atë dhe kur makina mbërriti në garazhin e tij, teksa shkarkohej ajo ra mbi një prej mekanikëve duke i thyer dy këmbët. Gjatë një gare me makina më 24 tetor 1956 dy persona, Troy McHenry dhe William Eschrid po ngisnin makina që kishin pjesë nga makina famëkeqe. McHenry vdiq në makinën e tij, e cila u përplas me një pemë ndërsa Eschrid u plagos rëndë por mbijetoi.
Mallkimi Gandi
Me pavarësinë e Indisë në vitin 1947 lindi dhe mallkimi Gandi. Patriarku Jauaharlal Nehur shërbeu si kryeministri i parë i Indisë. Vajza e tij Indira ishte kryeministre nga viti 1966-1977 dhe u zgjodh në atë post sërish në vitin 1980. Ajo kishte përgatitur djalin e saj më të ri Sanjay që të ndiqte hapat e saj, por ai vdiq në një aksident ajror. Dhe kohë më vonë ajo u vra me 35 plumba. Djali i Indira Gandit, Rajiv, ndoqi rrugën e së ëmës duke u bërë kryeministër i Indisë deri sa vdiq në 1991 nga një shpërthim i një gruaje bombë.
Mallkimi “Tippecanoe”
William Henry Harrison fitoi presidencën e SHBA në vitin 1840 me sloganin “Tippecanoe dhe Tyler Too”. Kjo i referohej pjesëmarrjes së tij në betejën Tippecanoe në vitin 1811. Një vit më vonë ai vdiq. Që atëherë, deri ku u zgjodh Ronald Reagan në vitin 1980, çdo president që zgjidhej në një vit që mbaronte me zero vdiste në detyrë. Presidentet e prekur nga mallkimi janë: 1840 (W. Harrison), 1860 (Lincoln), 1920 (Harding), 1940 (F. Roosevelt), 1960 (Kennedy).
Mallkimi Gutman
Kur trajneri i famshëm Bela Gutman u largua nga Benfika në vitin 1962, ai mallkoi klubin duke thënë: “Për plot 100 vite, duke filluar që tani, Benfika nuk do fitojë kurrë një trofe në Evropë”. Në fakt, deri tani mallkimi i tij ka qenë i suksesshëm, pasi portugezët kanë arritur tetë herë deri në finale dhe në të gjitha rastet janë mundur. Tetë përpjekje, tetë mposhtje në finale. Në vitin 1990, kur Benfika luante me Milanin në finale, Eusebio shkoi te varri i Gutmanit dhe iu lut që ta hiqte mallkimin, por mesa duket nuk e dëgjoi…
Si ndodhi mallkimi
Suksesi i fundit i Benfikës është në vitin e largët 1962, me në krye hungarezin Bela Gutman, në finalen e Kupës së kampionëve kundër Realit të Madridit 5-3, po një vit më parë, më 1961, Bela Gutman kishte fituar trofeun me Benfikën kundër Barcelonës. Bela Gutman ishte një trajner i njohur hungarez, që u nda nga jeta në moshën 82 vjeçare në vitin 1981. Në karrierën e tij Gutman ka stërvitur ekipe si Milan, Vareze, Padova, Porto, Benfika dhe kombëtaren e Hungarisë.
Bela Gutman pas triumfit të dytë radhazi i kërkoi presidencës së Benfikës një premio, si shpërblim të punës së tij, por kërkesa e tij u refuzua prej stafit. Gutman vendosi të largohej nga ekipi dhe kur iku lëshoi një deklaratë e cila bën ende të dridhen tifozët e Benfikës, sa herë afrojnë finalet: ”Benfika nuk ka për të fituar një finale që nga sot e për 100 vite me radhë”.
Që nga ai moment e në vazhdim, finalet e Benfikës janë një makth i vërtetë, dhe e kanë shndërruar klubin në ekipin me më shumë finale të humbura në historinë e futbollit. Ndoshta duhet pritur 2062?!
