Rrezatimi i telefonit celular mund të kontribuojë në rënien e mprehtë të popullatave të insekteve që janë parë vitet e fundit në shumicën e vendeve evropiane, ka treguar një studim i gjerë në Gjermani.

Me ndikimin negativ të pesticideve dhe humbjes së habitateve, rritja e ekspozimit ndaj rrezatimit elektromagnetik “ka të ngjarë të ketë një ndikim negativ në botën e insekteve”, sipas një studimi të paraqitur javën e kaluar në Stuttgart. Studimi nuk është shqyrtuar ende nga shkencëtarë të tjerë të pavarur.

Analiza e 190 studimeve shkencore, së bashku me Shoqatën Gjermane për Ruajtjen e Natyrës dhe Biodiversitetit (NABU), u krye nga dy organizata joqeveritare, njëra nga Gjermania dhe tjetra nga Luksemburgu.

Studimi i referohet rezultateve të 83 studimeve shkencore, nga të cilat 72 treguan një efekt negativ të rrezatimit te bletët, grerëzat dhe mizat.

Efektet negative të përmendura variojnë nga aftësia e zvogëluar për të fluturuar, për shkak të shqetësimeve të fushës magnetike deri në dëmtimin e materialit gjenetik dhe larvat.

Në veçanti, rrezatimi i telefonave celularë dhe rrjeteve pa tel të internetit hap kanale kalciumi në qeliza të caktuara, që do të thotë se ato thithin më shumë jone kalciumi.

Kjo mund të shkaktojë një reaksion biokimik tek insektet që prish ritmin e tyre dhe ndikon negativisht në sistemin e tyre imunitar.

“Studimi sugjeron që, duke analizuar zvogëlimin dramatik të numrit të insekteve, ne duhet të marrim parasysh të gjitha shkaqet e mundshme”, beson Johannes Enssle, kreu i NABU me qendër në Baden-Wuerttemberg.

Ai tregon se është i vetëdijshëm për ndjeshmërinë e temës që lidhet me zakonet tona të përditshme dhe se ai e di se interesat e fortë ekonomik qëndrojnë prapa teknologjisë së komunikimit celular, transmeton KosovaPress.

Peter Hensinger nga organizata gjermane e mbrojtjes së konsumatorit Diagnose Funk beson se më shumë vëmendje duhet t’i kushtohet efekteve të mundshme negative të rrezatimit në kafshë dhe njerëz, veçanërisht në lidhje me futjen e teknologjisë 5G.

Rrjetet e pajisura me teknologjinë e re pritet të ofrojnë shpejtësi njëqind herë më të larta se rrjetet ekzistuese 4G.

Ky zbulim ka rezultuar në reagime të dhunshme dhe kundërshtim nga aktivistët e përfshirë në fushata mjedisore, të cilët besojnë se mund të priten pasoja për shëndetin e njeriut dhe një ndikim negativ në mjedis.

LEAVE A REPLY

Please enter your comment!
Please enter your name here