Kryetari i Autoritetit Kosovar të Konkurrencës, Valon Prestreshi, ka bërë thirrje te qytetarët se për të gjithë artikujt e blerë me doemos të kërkojnë edhe kuponin fiskal.
Në këtë mënyrë edhe qytetarët mund të ndihmojnë që çmimet të qëndrojnë stabile dhe biznese të caktuara të mos e shfrytëzojnë situatën e krijuar.
“Si anëtar i Komisionit të posaçëm për parandalimin e infeksionit të Corona Virus COVID-19, ju bëj thirrje që çdo produkt ushqimor dhe farmaceutik që blini, detyrimisht merreni edhe kuponin fiskal. Është me lehtë për AKK dhe ATK-n në identifikimin e ndërmarrje që potencialisht abuzojnë me çmimet e produkteve. Gjurmën mbesin, shteti vepron”, ka shkruar ai në Facebook.
Ndërsa, sot gjatë ditës ATK-ja ka bërë të ditur se ka vërejtur rritje çmimesh dhe ka paralajmëruar mas ligjore për të gjithë ata që e keqpërdorin rastin.
