Në një kohë kur shumica e njerëzve ende përdornin makina shkrimi, Bill Gates dhe shoku i tij i fëmijërisë Paul Allen zhvilluan Microsoft, një kompani që prodhon softuer kompjuterik. Kompania që fillimisht u hap në New Mexico dhe në 1979 u zhvendos në Uashington, DC, u bë një nga shumëkombëshet më të mëdha në planet. Në vitin 1987, kur Microsoft doli publikisht, 31-vjeçari Gates u bë miliarderi më i ri në botë.
Siç ka rrëfyer edhe ai vetë, për t’ia dalë mbanë duhet të hiqte dorë nga disa vese të këqija që kishte. Në vitin 2005, ai kishte pranuar se gjatë kohës së tij në Harvard (ndërsa qëndroi, të paktën 2 vite dhe më pas e la), ishte një zvarritës i tepruar.
“Më pëlqente t’u tregoja njerëzve se nuk po punoja fare dhe se nuk do të shkoja në klasë dhe nuk isha i interesuar”, ka thënë ai.
Por në momentin e fundit, zakonisht dy ditë para çdo testi, ai studionte dhe ishte gjithmonë gati. “Njerëzit menduan se ishte qesharake. Ky ishte profili im: Djaloshi që nuk bënte asgjë deri para fundit”.
Sigurisht, kjo taktikë nuk funksionoi kur Gates hyri në botën e biznesit. “Askush nuk më lavdëroi që i bëj gjërat në minutën e fundit”, ka pranuar ai. “Kur u futa në biznes, ky ishte një zakon vërtet i keq dhe m’u deshën 1-2 vjet për ta kapërcyer atë,” kujton ai.
Ajo që bëri për të larguar zakonin e keq të zvarritjes ishte të ndiqte shembullin e shokëve të tij studentë, të cilët ishin gjithmonë të organizuar dhe i bënin gjërat në kohë.
Historia e krijimit të Microsoft
Bill Gates dhe Paul Allen u takuan në shkollë, kur Gates ishte 12 vjeç dhe Allen ishte 14. Siç do të shkruante më vonë Allen në librin e tij “Idea Man”, Gates ishte ende fëmijë kur vendosi të ndërtonte një nga kompanitë e tij më të mëdha.
I ardhur nga një familje e pasur, ai lexoi revistën “Fortune”, në të cilën prindërit e tij ishin abonuar. “Një ditë më tregoi numrin vjetor të revistës dhe më pyeti: “Si mendon se është të drejtosh një kompani Fortune 500?” Nuk e kisha idenë. Dhe Bill tha: “Ndoshta do të kemi kompaninë tonë një ditë”. Ai ishte 13 vjeç dhe tashmë një sipërmarrës i ri”, shkroi Allen.
Në vitin 1975, të dy themeluan Micro-Soft (siç quhej atëherë, nga fjalët mikroprocesorë dhe softuer) dhe filluan të prodhonin softuer kompjuterik.
Allen la punën e tij në Boston dhe Gates u largua nga Harvard për t’u fokusuar në kompaninë e tyre. Fillimisht, Microsoft bëri softuer për MITS, kompaninë e kompjuterit të parë personal Altair 8800, për të cilin zgjodhi Albuquerque, New Mexico si selinë e saj.
Në atë kohë, Bill Gates po vraponte nëpër shkretëtirën e Nju Meksikos me Porsche-n e tij aq shumë sa një herë, Paul Allen-it iu desh ta lironte nga burgu, ku kishte përfunduar pasi ishte arrestuar për shkelje të ligjit etj.
Përfundimisht, Microsoft u transferua në Seattle në 1979 dhe u bë një shumëkombëshe (sot është e dyta më e madhe për nga kapitalizimi i tregut në botë), ndërsa Bill Gates u bë miliarderi më i ri në botë në moshën 31-vjeçare kur kompania u bë publike.
Allen u largua nga Microsoft në 1983 pasi u diagnostikua me limfomën Hodgkin. Në atë kohë, ai po i nënshtrohej rrezatimit dhe si rezultat, kontributi i tij në kompani u zvogëlua, diçka që nuk kaloi pa u vënë re nga Bill Gates dhe CEO i atëhershëm i Microsoft, Steve Ballmer.
“Një pasdite në fund të dhjetorit 1982, dëgjova Bill-in dhe Steve-n duke folur me zë të lartë në zyrën e Bill-it dhe ndalova jashtë për të dëgjuar. Ishte e lehtë për të kuptuar kuptimin e bisedës. Ata po ankoheshin për mungesën e prodhimit tim dhe po diskutonin se si mund të reduktonin aksionet e mia në Microsoft duke lëshuar opsione për veten dhe aksionerët e tjerë. Ishte e qartë se ata kishin menduar për këtë për një kohë të gjatë”, shkruante Allen në librin e tij.
Tani ai ishte i vendosur të largohej, megjithëse Gates dhe Ballmer i kërkuan falje. Por shoku i tij i fëmijërisë do të përpiqej ta “zbriste” sërish. Ai ofroi të blinte interesin e tij për vetëm 5 dollarë për aksion. “Nuk jam i sigurt se jam i gatshëm të shes, por nuk do të diskutoja asgjë më pak se 10 dollarë për aksion”, ishte përgjigja e Allen. Bill Gates nuk pranoi dhe siç doli, ai po i bënte një nder të madh.
Duke mbajtur aksionet e tij në Microsoft pasi dha dorëheqjen nga kompania, Allen ishte në gjendje të bëhej miliarder. Në çdo rast, mënyra se si Allen i afrohet largimit të tij nga Microsoft në librin e tij është një mësim jete.
“Nëse kanceri do të kthehej, do të ishte e kotë – nëse jo e rrezikshme – t’i ktheheshim stresit të Microsoft. Nëse do të vazhdoja të shërohesha, tani e kuptova se jeta është shumë e shkurtër për të qenë të pakënaqur”.
Paul Allen vdiq në vitin 2018, në moshën 65-vjeçare, pas një përsëritjeje të kancerit të tij. Sipas Indeksit të Miliarderëve të Bloomberg, në kohën e vdekjes së tij ai kishte një pasuri prej 26.1 miliardë dollarësh. Pas largimit nga Microsoft, ai u përfshi në investime dhe filantropi.
“Paul ishte një partner i vërtetë dhe mik i dashur. Kompjuterët personalë nuk do të ekzistonin pa të”, tha Bill Gates pas vdekjes së tij. “Në mënyrën e tij të qetë dhe këmbëngulëse, ai krijoi produkte, përvoja dhe institucione magjike, dhe duke e bërë këtë, ndryshoi botën,” tha CEO aktual i Microsoft, Satya Nadella.
