Ua nxorrën thonjtë, ua thyen gjunjtë dhe eshtrat e duarve, gjersa në fund i pushkatuan në dalje të fshatit. Akoma janë të varrosur në një varrezë masive.
Një djalë të vogël që qante vazhdimisht, i cili quhej Nazmi, e mashtruan duke i thënë se po shkojnë “me i ruejt kingjat”. Më pas e vranë me të tjerët. Nexhmija 17 vjeçare u mundua të përleshej me partizanët për ta mbrojtur vëllain e saj 13 vjeçar, Kadriun. Një reportazh i viteve ’90 shkruante se edhe pas pesë dekadash shiheshin shenjat e dhunës në fytyrën e saj, kurse vëllai i saj, pasi kishte parë dhunën ndaj motrës, kishte pësuar shok psikik.
Ky është vetëm një episod i dhunës së egër dhe masakrave që partizanët e Titos ushtruan mbi civilët shqiptarë në kapërcyell të Luftës së Dytë Botërore. Madje, egërsinë makabre të partizanëve të Titos nuk e përjetuan vetëm shqiptarët.
