Si edhe çdo shpend, edhe kanarinat e duan lirinë, andaj mos i mbyllni në kafaz të vogël
Ato kanë nevojë për hapësirë sa më të madhe, ndërkaq dimensionet e kafazit nuk bënë të jenë më të vogla se 40 x 60 centimetra.
Pas papagallit tigër, kanarinat janë kanakarët më të shpeshtë pupëlorë në shtëpitë tona.
Mirëpo, para se të blini ndonjë, do të ishte mirë që të njiheshit me atë shpend temperament, i cili me këngën e vet do t’jua zbukurojë jetën.
Kanarinat janë të famshme për këngën e tyre melodike dhe për natyrën e tyre të ëmbël. Këta zogj popullor janë të vegjël dhe kanë nevojë për hapësirë më të vogël sesa speciet e tjera më të mëdha, transmeton Telegrafi.
Blerësit i tërheqin shumë kënga dhe puplat e tyre të bukura. Ka shumë lloje kanarinash. Është mirë që kanarina të blihet në një dyqan të njohur e të zgjidhet një zog i vogël në moshë.
Zogjtë e vegjël mësohen më mirë me mjedisin e ri dhe njerëzit e rinj. Zgjidhni një zog aktiv, me pupla të shëndetshme dhe me një shprehje të gëzueshme.
Llojet e zakonshme të kanarinave janë Harz-i, American Singer, Yorkshire, Lancashire, Scotch Fancy dhe Border-i.
Kënga e kanarinave ndryshon sipas llojit të tyre. Pasi ta keni blerë, çojeni yllin tuaj të ri të operës tek veterineri dhe mësoni të gjitha veprimet e rëndësishme që ju duhen për rritjen dhe kujdesin parandalues shëndetësor për zogun tuaj në mënyrë që ai të jetojë gjatë, i lumtur dhe i shëndetshëm.
Disa veterinerë janë të specializuar për kujdesin ndaj zogjve të shtëpisë si dhe zogjve ekzotikë dhe këta veterinerë do të ishin idealë për zogun tuaj. Zogun duhet ta çoni tek veterineri një herë në vit për një kontroll profesional si dhe për të marrë masat parandaluese të shëndetit.
Marrëdhëniet e veçanta midis kanarinave dhe njerëzve janë vendosur që në periudhën e hershme të industrisë minerale. Minatorët mbanin kanarina në minierë. Në rast se cilësia e ajrit nuk ishte e mirë, kanarinat ishin të parat ato që tregonin shenja pakënaqësie.
Kanarinat jetojnë mesatarisht 7 vjet, megjithëse jetëgjatësia e tyre ndryshon shumë nga njëri lloj në tjetrin. Jetëgjatësia e tyre shkon nga 5 deri në 20 vjet.
Kafazi duhet të jetë 40 cm x 60 cm dhe të ketë të paktën të njëjtën lartësi.
Ushqimi mund të ndryshojë disi midis llojeve të ndryshme të kanarinave e për të kuptuar programin ushqimor më të përshtatshëm për ta mund t’ju ndihmojë shitësi apo veterineri juaj.
Ushqimi duhet të përbëhet nga një përzierje farërash apo thërrimesh me ushqime të gjelbra dhe me sasi të vogla proteinash, niseshteje dhe vitaminash si dhe me burime kalciumi të tilla si guaskat e gocave të detit. Uji duhet të ndërrohet shpesh në mënyrë që të jetë i freskët. /Telegrafi/
