Organizata Botërore e Shëndetësisë thekson se siguria ushqimore duhet të jetë gjithmonë një prioritet, pasi ajo ndihmon në parandalimin e sëmundjeve që vijnë nga ushqimi. Sipas OBSH-së, hapa të thjeshtë si mbajtja e pastër e zonave të përgatitjes së ushqimit, ndarja e ushqimeve të papërpunuara nga ato të gatuara dhe ruajtja e ushqimit në temperatura të sigurta janë thelbësore për mbrojtjen e shëndetit të konsumatorëve.
Ja disa mite që janë të vërteta dhe disa të gabuara sipas OBSH-së!
A mund ta kuptosh nëse ushqimi është i sigurt për t’u ngrënë nga pamja dhe era e tij?
JO!
Shumica e mikroorganizmave që mund të të sëmurin nuk ndryshojnë pamjen apo erën e ushqimit.
A duhet të lahen frutat dhe perimet para se të qërohen?
PO!
Larja me ujë të pastër largon dheun dhe ndotës të tjerë.
A duhet të lahet mishi i pulës para gatimit?
JO!
Larja e pulës mund të përhapë mikroorganizma të dëmshëm në duar, sipërfaqe, enë ose ushqime të tjera.
A mund të mbijetojnë bakteret e dëmshme në ngrirjeje?
PO!
Disa baktere bëhen joaktive kur ngrijnë, por pas shkrirjes mund të bëhen sërish të rrezikshme. Prandaj, shkrijeni ushqimin në frigorifer dhe gatuajeni mirë.
A mund të hahet ushqimi që ka rënë në dysheme nëse e merr brenda 5 sekondave?
JO!
Mikroorganizmat mund të kalojnë në ushqim menjëherë dhe të shkaktojnë sëmundje.
A mund të sëmurem nga ushqimi që kam ngrënë 3 ditë më parë?
PO!
Disa mikroorganizma të dëmshëm kanë nevojë për më shumë kohë se disa orë për të shkaktuar sëmundje.
A mund të jetë sëmundja nga ushqimi fatale?
PO!
Në disa raste, njerëzit mund të vdesin nga ushqimi i pasigurt. Këshillat e sigurisë ushqimore ulin rrezikun.
A është e sigurt shkrirja e ushqimit të ngrirë në temperaturë dhome?
JO!
Shkrirja duhet bërë në frigorifer ose në ujë të ftohtë për të parandaluar rritjen e mikroorganizmave./dritare.net
