Kur Marlon Brando fitoi Oscar-in për rolin e tij në filmin “The Godfather” (1973) për interpretimin e Vito Corleone-s, situata ishte e veçantë dhe një nga momentet më të paharrueshme në historinë e ceremonisë së Academy Awards.
Në vend që të pranonte vetë çmimin, Brando refuzoi Oscar-in si shenjë proteste ndaj trajtimit të amerikanëve vendas (Native Americans) në Hollywood dhe politikave të qeverisë amerikane. Në vend të tij, ai dërgoi një aktiviste me emrin Sacheen Littlefeather (e veshur me rroba tradicionale të popujve indigjenë).
Kur emri i Brando-s u shpall fitues, Littlefeather doli në skenë dhe refuzoi statujën e artë. Ajo tha se Brando nuk mund ta pranonte çmimin për shkak të mënyrës si filmat dhe industria e Hollywood-it i paraqisnin Native Americans dhe për shkak të ngjarjeve të dhunshme të asaj kohe në Wounded Knee, ku aktivistët indigjenë ishin në përplasje me autoritetet amerikane.
Kjo gjë shkaktoi reagime të forta: një pjesë e publikut e duartrokiti, ndërsa një pjesë tjetër e fishkëllyu. Akti i Brando-s mbetet një nga momentet më politikisht të ngarkuara në historinë e Oscars. /Trungu & InforCulture
