Eklipsi diellor i tetorit do të krijojë ‘unazën e zjarrit’, ja vendet ku do të mund të shihet?

 

Gati gjashtë muaj pas Eklipsit të plotë të Diellit të këtij viti, admiruesit e qiellit po përgatiten përsëri të shikojnë eklipsin e dytë dhe të fundit diellor të këtij viti, i cili do të krijojë një “unazë zjarri” të rrallë.

Një “unazë zjarri” ndodh kur hëna rreshtohet midis diellit dhe Tokës për të krijuar një eklips diellor, por nuk e bllokon plotësisht dritën e diellit.

Lexo edhe:
Arkeologët zbulojnë kutinë 1500 vjeçare të fildishit që lidhet me Moisiun dhe Dhjetë Urdhëresat

Fatkeqësisht, jo të gjithë mund ta dëshmojnë këtë fenomen, pasi do të jetë i dukshëm vetëm në pjesë të Amerikës së Jugut, mes të mërkurës dhe të enjtes, raportoi AFP.

“Për eklipsin e ardhshëm diellor, hëna do të jetë më larg se zakonisht nga Toka, kështu që ata që ndodhen në pjesë të Kilit dhe Argjentinës do të jenë në gjendje të shijojnë “një lloj unaze drite që vjen nga Dielli”, -tha Diego Hernandez, kreu i shpërndarjes shkencore në Planetariumin e Buenos Aires.

Rruga e eklipsit diellor do të fillojë në Paqësorin e Veriut, do të kalojë mbi rajonet e Andeve dhe Patagonisë të Amerikës Latine dhe do të përfundojë në Atlantik. Eklipsi do të zgjasë më shumë se tre orë, nga ora 17:00 deri në rreth 20:30 GMT, sipas Administratës Kombëtare të Aeronautikës dhe Hapësirës (NASA). Por fenomeni i “unazës së zjarrit” pritet të zgjasë vetëm disa minuta, duke ndodhur rreth orës 18:45 GMT, sipas institutit IMCCE të Observatorit të Parisit të Francës.

Ndërkohë, një eklips i pjesshëm do të jetë i dukshëm nga Bolivia, Peruja, Paraguai, Uruguai, pjesë të Brazilit, Meksika, Zelanda e Re dhe disa ishuj në oqeanin Paqësor dhe Atlantik, tha NASA.

Agjencitë dhe institutet hapësinore kanë paralajmëruar kundër vëzhgimit të një eklipsi me sy të lirë, duke thënë se mund të shkaktojë dëme të pakthyeshme në retinë, gjë që nuk mund të parandalohet nga syzet e zakonshme të diellit. Metodat e vetme të sigurta, sipas NASA dhe IMCEE, janë përdorimi i syzeve speciale të certifikuara të eklipsit.

Eklipsi tjetër i pjesshëm diellor do të ndodhë më 29 mars 2025, i dukshëm kryesisht nga Amerika e Veriut perëndimore, Evropa dhe Afrika veriperëndimore.