Peticion digjital për përfshirjen e plisit shqiptar në listën e UNESCO-s

Një peticion online ka nisur të shpërndahet, përmes të cilit nënshkruesit u drejtohen institucioneve të UNESCO-s me kërkesën që plisi shqiptar të njihet si element zyrtar i trashëgimisë kulturore dhe të përfshihet në Listën e Trashëgimisë Kulturore Jomateriale. Sipas iniciatorëve, një njohje e tillë do të përbënte jo vetëm një vlerësim të denjë për trashëgiminë tonë kulturore, por edhe një garanci që brezat e ardhshëm ta njohin dhe ta vlerësojnë këtë simbol thelbësor të identitetit shqiptar.

Përfshirja zyrtare e plisit në listën e pasurive botërore do të kishte gjithashtu ndikim pozitiv në zhvillimin e turizmit rajonal, duke nxitur interesin e vizitorëve për të zbuluar dhe përjetuar nga afër kulturën tonë të gjallë dhe autentike.

Autorët e peticionit theksojnë se plisi shqiptar përballet me rrezikun e margjinalizimit për shkak të mungesës së njohjes dhe promovimit në nivel ndërkombëtar.

I përdorur nga shqiptarët prej shekujsh, plisi mbart një peshë të veçantë historike dhe kulturore. Ai përfaqëson vazhdimësinë e traditave tona, lidh brezat e sotëm me paraardhësit dhe kontribuon në forcimin e ndjenjës së unitetit dhe krenarisë kombëtare.

Përmes këtij peticioni, qytetarët ftohen të bashkojnë zërin e tyre në mbështetje të njohjes ndërkombëtare të plisit shqiptar, si një hap i rëndësishëm për mbrojtjen dhe ruajtjen e trashëgimisë sonë kulturore, në dobi jo vetëm të shqiptarëve, por edhe të komunitetit global.

Linku për tek peticioni: https://c.org/vDf2KP5pkx