Sa gradë duhet të jetë frigoriferi në verë? Mos e vendosni poshtë kësaj temperature

 

 

Shumë persona besojnë se ushqimet ruhen më mirë kështu, por një rregull i thjeshtë përcakton kufirin mes sigurisë dhe ngrirjes së panevojshme

 

 

Pavarësisht stinës, frigoriferi duhet të mbahet gjithmonë në një temperaturë nën 4°C. Kjo sepse bakteret nisin të shumohen më shpejt sapo ushqimi arrin ose e kalon këtë nivel temperature.

Sipas Departamentit Amerikan të Energjisë, temperatura e rekomanduar për frigoriferin është afërsisht 3°C, megjithëse ajo mund të ulet edhe deri rreth 1.5°C. Kjo bën të mundur që pjesët më të ngrohta të frigoriferit, si dera, të qëndrojnë nën 4°C, ndërsa pjesa e pasme të mos ftohet më tepër seç duhet. Kur temperatura shkon pranë 1°C, ushqimet mund të fillojnë të ngrijnë.

 

 

A duhet rregulluar temperatura gjatë verës?

Nëse në verë ambienti i shtëpisë bëhet më i ngrohtë, mund të duket e arsyeshme ta ulni temperaturën e frigoriferit. Megjithatë, për pjesën më të madhe të pajisjeve moderne, kjo zakonisht nuk është e nevojshme. Nëse vini re se frigoriferi nuk po ftoh sa duhet, atëherë temperatura duhet kontrolluar.

 

Shumë frigoriferë të rinj janë të pajisur me ekran digjital që tregon temperaturën aktuale, duke e bërë më të thjeshtë verifikimin. Ndërsa modelet më të vjetra ose ato më bazike shpesh kanë vetëm një rrotëz me numra, si 1 deri në 5, ku nuk kuptohet gjithmonë qartë sa e ftohtë është pjesa e brendshme. Në raste të tilla, zgjidhja më e mirë është përdorimi i një termometri.

 

 

Akoma më mirë është të vendosni dy termometra: një në raftin e sipërm dhe një tjetër në raftin e poshtëm, duke i parë herë pas here. Nëse temperatura afrohet te 4°C, shtoni nivelin e ftohjes. Më pas, pas 24 orësh, kontrollojeni përsëri për të parë nëse situata është përmirësuar, transmeton Telegrafi.

 

 

Si ta mbani frigoriferin të ftohtë gjatë verës?

• Mos e lini derën e frigoriferit hapur më shumë nga sa duhet.

• Mos rrini përballë frigoriferit duke vendosur çfarë të merrni.

• Një frigorifer i mbushur e ruan më lehtë temperaturën; nëse është bosh, mund të vendosni brenda shishe me ujë ose pije.

 

 

• Mos i bllokoni vrimat e ventilimit në brendësi të frigoriferit.

• Ushqimet e ngrohta lërini të ftohen përpara se t’i fusni në frigorifer.

• Në rast ndërprerjeje të energjisë elektrike, mbajeni derën të mbyllur sa më shumë të mundeni.

 

 

• Pastroni rregullisht pluhurin nga rrjetat e pasme të frigoriferit, pra nga kondensatori.

• Kontrolloni gomat e derës dhe ndërrojini nëse nuk mbyllen siç duhet.