Pse s’ka kufizim shpejtësie në autostradat gjermane?

Megjithëse kërkimet kanë treguar se vendosja e kufizimit të shpejtësisë mund të zvogëlojë ndjeshëm emetimet e gazeve serrë me rreth dy milionë tonë në vit, autoritetet gjermane ende nuk po e konsiderojnë seriozisht opsionin. Por çfarë fshihet pas këtij vendimi të pazakontë dhe pse nuk ka kufizime të shpejtësisë në autostradat gjermane?

Siç shkruan faqja e specializuar dedikuar veturave “Auto Portal”, shumë turistë nga e gjithë bota vijnë në Gjermani për të përjetuar vozitje në autostrada pa kufi shpejtësie. Është interesante se ka edhe paketa të veçanta udhëtimi nga destinacionet botërore, duke përfshirë Japoninë, Kinën, vendet arabe dhe Shtetet e Bashkuara, ku përfshihet vozitja pa kufi në autostradat gjermane. Vlerësohet se Gjermania gjeneron 10 miliardë euro në vit, bazuar vetëm në këtë përvojë turistike.

Autostradat gjermane janë shpesh të gjera dhe të drejta, duke u dhënë drejtuesve më shumë kontroll dhe duke reduktuar rrezikun pavarësisht shpejtësisë së lartë. Përveç kësaj, Gjermania ka traditë në trajnimin e shoferëve. Drejtuesit e mjeteve kur marrin patentë shoferin janë të trajnuar për standarde të larta sigurie dhe aftësi të vozitjes me shpejtësi të lartë.

Megjithëse nuk ka kufi universal të shpejtësisë, kufizimet e përkohshme të shpejtësisë mund të zbatohen në seksione të caktuara të autostradave, përmes shenjave rrugore të trafikut. Këto kufizime shpesh vendosen për shkak të kushteve të këqija të motit ose punimeve në rrugë.