Porosia e Sulltan Mehmet Fatihut për të birin

“Unë po vdes, por nuk ndihem aspak keq, sepse po lë pas vete pasardhës sikurse ti. Ji i drejtë, i mirë dhe i mëshirshëm! Të gjithë qytetarëve jepua mbrojtjen tënde pa kurrfarë dallimi. Puno për të përhapur fenë islame, ngase ky është obligimi i mbretërve në tokë. Interesohu për çështjet e fesë më shumë se për çdo gjë tjetër dhe asnjëherë mos u ndal nga kjo! Mos bashkëpuno me njerëz që nuk interesohen për kauzën e fesë e as me ata që nuk largohen nga mëkatet e mëdha dhe zhyten në punë të ndyra. Largoju bidateve shkatërruese dhe largohu nga ata që nxisin në to. Zgjeroji kufijtë e vendit me xhihad, ruaje pasurinë e shtetit (bejtu’l-mal), që të mos shpërdorohet! Kurrsesi mos e vër dorën tënde në pasurinë e ndonjë qytetari, përveçse me të drejtën e Islamit! Të varfërve sigurojua ushqimin! Respektoji në mënyrë të veçantë ata që e meritojnë një gjë të tillë! Meqë dijetarët janë si fuqia e shpërndarë në trup të Perandorisë, respektoji dhe inkurajoji ata! Nëse dëgjon për ndonjë dijetar në ndonjë vend tjetër, kërko që të vijë te ti dhe nderoje me pasuri!

Kujdes, mos të të mashtrojë pasuria e as ushtria! Mos i largo njerëzit e sheriatit nga dera jote! Ruaju që të mos anosh nga ndonjë punë që është në kundërshtim me normat e sheriatit. Feja është synimi ynë, udhëzimi është programi ynë, kështu e kemi arritur fitoren. Merre nga unë këtë mësim e këshillë: ‘Kam ardhur në këto vende si një buburrec i vogël, por Allahu më dha begati të mëdha. Pasoje rrugën time, ec hapave të mi! Puno për ta ngritur këtë fe, për të nderuar ithtarët e saj! Mos e harxho pasurinë e Perandorisë në luks e dëfrim e as më tepër sesa që është e nevojshme, sepse këto janë shkaqe të shkatërrimit.’” (“Perandoria Osmane, faktorët e ngritjes dhe rënies së saj”, dr. Ali Salabi, fq. 168, Prishtinë 2009)

Përkitazi me Sulltan Mehmet Fatihun, çlirimtarin e Kostandinopojës dhe ushtrinë e tij, i Dërguari i Allahut ﷺ ka thënë: “Vërtet do të çlirohet Kostandinopoja. Sa i mirë që është ai udhëheqës dhe sa e mirë që është ajo ushtri.” Konstandinopoja (Stambolli) u çlirua më 29 maj 1453 /KI