Si të hiqni mykun dhe kondensimin nga dritaret gjatë dimrit?

 

Myku që depërton në shtëpi mund të bëhet një shqetësim serioz gjatë muajve të ftohtë, dhe një nga arsyet kryesore pse sporet fillojnë të zhvillohen është kondensimi i tepërt në dritare.

Myku mund të mbijetojë vetëm në kushte të lagështa, prandaj bëhet problem shpesh në dimër, kur ajri i ngrohtë brenda shtëpisë përplaset me sipërfaqen e ftohtë të xhamit.

Nëse kondensimi nuk pastrohet në kohë, ai shkakton lagështi në dhomë, duke krijuar ambientin ideal për mykun që të lëshojë sporet në ajër dhe të përhapet.

Eksperti Simon Crow nga “Supply Only Doors” ka zbuluar mënyrën më të mirë për të pastruar dritaret nga kondensimi dhe myku. Ai tha se dy përbërës të zakonshëm të kuzhinës mund të përzihen për të krijuar një “vrasës natyral të mykut”.

Simon shpjegon: “Lëngu i limonit dhe soda e bukës janë pastrues natyralë që mund të përdoren për të hequr mykun, papastërtitë dhe yndyrat. Limonët përmbajnë acid citrik në përqendrim të lartë dhe kanë veti natyrale antibakteriale.

Soda e bukës është një substancë alkaline me pH mes 8 dhe 9 – që është më e lartë se ajo që shumica e llojeve të mykut mund të përballojnë”.

Lëngu i limonit ndihmon në shpërbërjen e mykut dhe krijon një mjedis shumë acid që parandalon përhapjen e sporeve, ndërsa soda e bukës jo vetëm që ndihmon në vrasjen e mykut, por gjithashtu thith shpejt lagështinë, duke parandaluar grumbullimin e saj në dhomë.

Si të hiqni mykun nga shtëpia:

Përzieni 120 ml lëng limoni me 45 g sodë buke derisa të formohet një pastë e trashë.

Aplikojeni pastën në zonat ku ka myk në shtëpi ose mbi xhamat e dritareve për të thithur lagështinë.

Lëreni pastën të thahet plotësisht (zakonisht 15 deri në 30 minuta).

Pasi të jetë tharë, hiqeni me një sfungjer të lagur dhe një kovë me ujë të ngrohtë dhe pak lëng për larje enësh.

Fshini butësisht sipërfaqen për të larguar mykun dhe pastën.

Përdorni një leckë të pastër dhe të thatë për të thajtur plotësisht sipërfaqen ose xhamin.

Sigurohuni që dhoma të jetë mirë e ajrosur për të parandaluar grumbullimin e mëtejshëm të lagështisë.