U lind në Vushtrri të Kosovës dhe i ati ishte pjesë e administratës osmane. I shkolluar midis Selanikut, më pas Stambollit ai do të bëhej një nga zërat më mbështetës të lëvizjes për pavarësi të kombit tonë. Pjesëmarrës në disa kuvende dhe kryengritje ku tema e nxehtë për mëmëdheun do ta brumoste atë me ideale të forta kombëtare. Ai është përkrahës i revolucionit xhonturk dhe do të përfaqësohej në parlamentin e ri osman si anëtar i partisë liberale të kryesuar nga Ismail Qemal Bej Vlora.
Hasan Bej Prishtina do të mbahet mënd edhe për planin me 14 pika që ju paraqit autoriteteve osmane për t’i kërkuar autonomi të Vilajetit Shqiptar. Është pjesëtar jo vetëm në lëvizjet për shtetformim por nëpërmjet miqve si Gabriele D’Annunzio do të bashkrendonte forcat kundër ekspasionit Serb jo vetëm në territorin Shqiptar por edhe në atë që Italianët rivendikonin. Hasan Bej do të ishte një oponent i fortë karshi politikave Zogiste dhe mendohet se qëndrimet dhe pjesëmarrja e tij kundër këtyre politikave do t’i kushtonin edhe jetën pikërisht në këtë ditë të vitit 1933. Bashkëlidhur po ju dëshmojmë edhe një biografi të shkurtër që Britanikët disponin për të duke e quajtur revolucionar të lindur dhe armik i Serbëve.

ArkivatKujtojnë