Sara Jashari, vajza nga Kumanova që po mahnit botën e Teknologjisë dhe Inteligjencës Artificiale

Ahmed Kalaja

Në një kohë kur kërkimi shkencor kërkon vite punë dhe përvojë për të sjellë rezultate të publikuara, një studente shqiptare nga Kumanova ka arritur të sfidojë këtë normë. Sara Jashari, studente e shkencave kompjuterike dhe mastere e shkencave të të dhënave, ka realizuar një sukses të jashtëzakonshëm: shtatë punime të publikuara në konferenca të nivelit ndërkombëtar brenda vetëm një viti. Ky është një rezultat që rrallëherë e arrijnë edhe studiuesit me doktoratë, ndërsa për një studente master konsiderohet arritje e jashtëzakonshme në botën akademike.

Gjatë vitit akademik 2024-2025, Sara ka qenë bashkautore dhe prezantuese në disa prej konferencave më të rëndësishme në fushën e teknologjisë, realitetit të shtuar (XR), inteligjencës artificiale dhe grafikës kompjuterike.

Një nga sukseset më të mëdha të Sarës është pranimi i punimit të saj si bashkautore e parë në ISMAR 2025, konferenca më elitare e botës në fushën e realitetit të përzier dhe realitetit të shtuar. ISMAR konsiderohet një prej ngjarjeve më prestigjioze të teknologjisë XR, ku botohen vetëm punimet më të avancuara. Të arrish këtë nivel në fazën e studimeve master është arritje që shumë studiues e synojnë për vite me radhë.

Ky publikim e vendos Sarën si një nga talentet më premtuese të rajonit në kërkimin shkencor të realitetit virtual, panoramave immersive dhe teknologjive 360°.

Një tjetër sukses i rëndësishëm është pjesëmarrja e saj me disa punime në ACM Web3D 2025, konferencë ndërkombëtare e njohur për teknologjitë 3D, VR, Metaverse dhe WebXR. Punimet e Sarës janë fokusuar në turizmin virtual interaktiv, transferimin e stilit me inteligjencë artificiale në panoramat 360°, si dhe zgjidhje inovative për WebXR, duke marrë vlerësime të larta nga komuniteti akademik dhe pjesëmarrës nga industria.

Në STAG – Smart Tools and Applications in Graphics, një konferencë nën patronazhin e Eurographics Italian Chapter, Sara ka prezantuar dy punime shkencore. Njëri prej tyre, VISPI – Virtual Staging Pipeline for Single Indoor Panoramic Images, u nderua me çmimin: “Best Paper Award”.

Ky projekt ka zgjuar interes të veçantë për qasjen inovative me të cilën transformohen pamjet panoramike 360° në ambiente virtuale të gjeneruara inteligjentisht, një teknologji me përdorim të madh në arkitekturë, metaverse dhe industri kreative.

Ajo që e bën historinë e Sarës edhe më të veçantë është fakti se ajo ka arritur të bashkëpunojë me disa prej institucioneve dhe qendrave kërkimore më prestigjioze në botë, si: Qatar Computing Research Institute (QCRI) Hamad Bin Khalifa University (HBKU), CRS4 – Itali dhe ekspertë të njohur ndërkombëtarë në fushën e grafikës kompjuterike, XR dhe inteligjencës artificiale. Në një kohë të shkurtër, ajo ka krijuar një portofol profesional që shumë studiues e ndërtojnë për vite, duke kombinuar talentin, disiplinën shkencore dhe pasionin për teknologjinë më të avancuar.

Historia e Sarës nuk është vetëm një sukses personal, por edhe një frymëzim për shumë të rinj shqiptarë që dëshirojnë të depërtojnë në botën e teknologjisë dhe kërkimit shkencor global. Me publikime në konferencat më të mëdha botërore, çmime ndërkombëtare dhe bashkëpunime me qendra kërkimore të nivelit të lartë, Sara Jashari po ndërton një karrierë që premton shumë – dhe që sapo ka filluar. /Trungu