Automjeti më i fundit luftarak rus – kamion i vitit 1952

Automjeti luftarak më i fundit rus është një kamion i prodhuar në vitin 1952 – GAZ-69 – thënë realisht me dizajn mbi 70-vjeçar.

Ai është një nga mjetet më të reja që ushtria ruse po dërgon në fushat e betejës në Ukrainë.

Fotot e publikuara së fundmi tregojnë disa GAZ-69 pranë vijës së parë të luftës që Rusia ka zhvilluar për më shumë se tri vjet. Të paktën një automjet është pajisur me rrjeta antidrone, raporton Forbes, përcjell KosovaPress.

Shfaqja e këtij kamioni të vjetruar konfirmon se ushtrisë ruse po i mbarojnë me shpejtësi automjetet e blinduara. Sipas vlerësimeve, deri më tani ka humbur mbi 20.000 automjete të blinduara dhe të rënda luftarake. Për krahasim, e gjithë ushtria britanike ka rreth 18.000 automjete ushtarake.

Ndërsa Rusia humbet automjetet e blinduara më shpejt se sa mund t’i prodhojë ose t’i heqë ato nga magazinimi, ajo po mbështetet gjithnjë e më shumë në automjetet civile – jo vetëm për logjistikën, por edhe për sulmet e drejtpërdrejta në pozicionet ukrainase.

Mjetet civile janë dukshëm më të cenueshme nga minat, artileria, dronët dhe sulmet me raketa sesa automjetet ushtarake. Kamionë të blinduar të improvizuar, furgona, makina pasagjerësh, madje edhe katërçikleta dhe “karroca golfi” përbëjnë tani rreth 70% të viktimave ruse, tregon një studim i fundit.

Duke u mbështetur në automjetet civile, trupat ruse po përshpejtojnë më tej demekanizimin e tyre – sepse automjete të tilla shkatërrohen edhe më shpejt se mjetet e blinduara gjithnjë e më të rralla. Rrjedhimisht, nevoja për mjete transporti edhe më të papërshtatshme po rritet – skuterë elektrikë, madje edhe kuaj dhe gomarë. Mundësia e vetme e mbetur është – ecja në fushën e betejës.

Regjimentet e demekanizuara mund të jenë në gjendje të shtypin përkohësisht brigadat ukrainase, por nuk janë në gjendje të shfrytëzojnë boshllëqet në mbrojtjen e Ukrainës.