A duhet të hamë tre vakte në ditë?

Ideja se duhet të hamë tre vakte në ditë është më e zakonshme nga sa mund ta mendoni. Por, a është kjo mënyra më e shëndetshme për të ngrënë?

Pothuajse të gjithë hamë tre vakte në ditë, sepse jeta jonë është ndërtuar rreth këtij modeli. Na thuhet se mëngjesi është vakti më i rëndësishëm i ditës, kemi pushime për drekë gjatë punës dhe jeta sociale apo familjare shpesh lidhet me darkën. Por, shkenca ngre pyetjen: A është kjo mënyra më e mirë për shëndetin tonë?

Përpara se të mendojmë se sa shpesh duhet të hamë, studiuesit sugjerojnë të marrim në konsideratë periudhat kur nuk duhet të hamë fare.

Pse trupit tonë i duhet pushim nga ushqimi?

Sipas Emily Manoogian, hulumtuese në “Salk Institute“, të sigurosh të paktën 12 orë në ditë pa ushqim i jep sistemit tretës mundësinë për t’u qetësuar. Në një studim të vitit 2019 të titulluar “Kur të hamë”, ajo argumenton se këto periudha pushimi janë të rëndësishme për shëndetin tonë të përgjithshëm.

Rozalyn Anderson, profesoreshë e asociuar në “University of Wisconsin”, ka studiuar përfitimet e kufizimit të kalorive, të cilat lidhen me uljen e niveleve të inflamacionit në trup.

“Sipas kërkimeve, një periudhë agjërimi çdo ditë mund të sjellë përfitime të rëndësishme,” thotë ajo. “Agjërimi e vendos trupin në një gjendje të ndryshme, ku ai është më i përgatitur për të riparuar dëmet dhe për të pastruar proteina të deformuara.”

Proteinat e deformuara janë versione të dëmtuara të proteinave të zakonshme, të cilat janë molekula që kryejnë funksione të rëndësishme në trup. Këto proteina janë të lidhura me një sërë sëmundjesh dhe një periudhë agjërimi mund të ndihmojë në parandalimin e tyre.

Si të ndërtojmë një rutinë më të shëndetshme?

Në vend që të përqendrohemi vetëm te numri i vakteve, mund të jetë më e dobishme të përshtatim një rutinë ku trupit i jepet koha për pushim dhe rigjenerim. Periudha e agjërimit prej 12 orësh, qoftë nga darka deri në mëngjes, mund të jetë një hap i thjeshtë për të përmirësuar shëndetin dhe funksionimin e trupit.

Përgjigjja për pyetjen “A duhet të hamë tre vakte në ditë?” mund të jetë më e komplikuar nga sa duket. Më e rëndësishmja është të dëgjojmë trupin tonë dhe të krijojmë një ekuilibër që mbështet shëndetin afatgjatë. /Telegrafi/