Kujdes nga këto mesazhe që ju vijnë! Policia jep alarmin: Kanë qëllim t’ju vjedhin Facebook-un

Policia e Shtetit thotë se një sërë mesazhesh mashtruese kanë nisur të mbërrijnë në telefonat celularë të qytetarëve.

Policia thotë se këto mesazhe kanë për qëllim vjedhjen e profileve në rrjetin social Facebook, duke i trembur përdoruesit se gjoja po u mbyllet llogaria.

Bashkë me mesazhet keqpërdoruesit dërgojnë edhe një link, që nuk duhet të klikohet pasi shfaqet si pamje e Facebook-ut, por duke futur të dhënat, në fakt, ia dërgoni ato “hakerave”.

Njoftimi i Policisë:

Sektori për Hetimin e Krimeve Kibernetike në DVP Tiranë gjatë monitorimit të vazhdueshëm të burimeve të hapura të informacionit dhe platformave virtuale, me qëllim evidentimin e veprimtarive të kundraligjshme kryesisht në fushën e krimeve kibernetike, ka konstatuar mesazhe të maskuara si ato të kompanisë Meta Platforms, drejt numrave të telefonit, për konfirmimin e të dhënave në rrjetin social Facebook, të lidhura me shërbimin Facebook Ads, (por jo vetëm).

Në këto mesazhe pretendohet verifikimi i llogarive në Facebook ose në të kundërt, llogaria do të mbyllet.

Mesazhet mashtruese kanë si synim orientimin e poseduesve të llogarive drejt linqeve mashtruese me qëllim marrjen në posedim të llogarive tëpersonave të mashtruar, në menyrë të padrejtë.

Sektori për Hetimin e Krimeve Kibernetike në DVP Tiranë bën thirrje që nqs jeni ose dyshoni se mund të jeni i prekur nga dërgimi i këtyre mesazheve, të paraqiteni pranë zyrave tona, si dhe këshillon që të mos kryeni asnjë veprim kundrejt këtyre mesazheve, të cilat mund të vijnë nga numra kryesisht të huaj.