Studimi: Shëndeti i prindërve është në rrezik, ja arsyet

Prindërit po punojnë më shumë orë dhe po kalojnë më shumë kohë duke u kujdesur për fëmijët e tyre sesa prindërit në të kaluarën—të gjitha këto ndërsa përballojnë regjistrimet për aktivitete jashtëshkollore, takimet me miq, formularët e shkollës, vizitat te mjeku dhe më shumë.

Prindërit po luftojnë me kostot e larta të kujdesit për fëmijët, arsimit dhe kujdesit shëndetësor.

Ata po përpiqen të gjejnë kohë të mjaftueshme për punë, kujdesin ndaj fëmijëve dhe ngarkesën mendore të prindërimit. Ata janë gjithashtu të shqetësuar për sfidat e shëndetit mendor me të cilat përballen shumë fëmijë. Ata gjithashtu sfidohen nga mënyra se si të trajtojnë çështjen e përdorimin të mediave sociale nga fëmijët e tyre, sepse prindërit po përballen me një “kulturë intensifikimi të krahasimit” të inkurajuar nga ndikuesit e mediave sociale që tregojnë, sesi duhet të jetë prindërimi i përsosur, sipas supozimeve të tyre.

Gjërat janë edhe më keq për prindërit me probleme të shtuara, si për shembull ata që janë beqarë, kanë fëmijë me nevoja të veçanta, ose janë divorcuar së fundmi. Dhe nëse prindërit janë të stresuar, fëmijët stresohen. Nuk është çudi që betejat e prindërve për shëndetin mendor mund të dëmtojnë të gjithë shoqërinë duke rritur kostot e kujdesit shëndetësor dhe duke ulur produktivitetin ekonomik.

“Thënë thjesht, prindërit gjithashtu kanë nevojë për kujdes”, thotë studimi.

Është e vërtetë se shumë nga këto probleme kërkojnë veprim nga ligjvënësit dhe punëdhënësit, dhe ky këshillim duhet të shërbejë si një thirrje zgjimi për të dy që kujdesi shëndetësor dhe kujdesi për fëmijët duhet të jenë më të përballueshëm dhe të aksesueshëm.

Ndërkohë, çfarë mund të bëjnë prindërit? Anna Seewald, një psikologe dhe drejtuese e podcast-it “Authentic Parenting”, thotë që prindërit mund të bëjnë ndryshime për të mbrojtur shëndetin e tyre fizik dhe mendor mes të gjitha këtyre sfidave.

Studimet thonë se shoqëria e bën jetën tepër të vështirë për prindërit, kështu që prindërit mund të përpiqen të rivlerësojnë pritshmëritë e tyre për veten e tyre.

“Prindërit i bëjnë shumë presion vetes që të jenë gjithmonë të qetë dhe të durueshëm dhe të kenë fëmijë të sjellshëm që bëjnë shumë aktivitete jashtëshkollore,” tha Seewald, por ajo shtoi se, “Pritjet e larta dhe krahasimet sociale çojnë në pakënaqësi dhe zhgënjim të madh.”

Është më mirë që prindërit të jenë realistë për atë që mund të bëjnë duke pasur parasysh rrethanat e tyre.

Ka shumë prindër që shpenzojnë shumë kohë në mediat sociale. Edhe fshirja e një aplikacioni të vetëm mund të çlirojë një sasi të konsiderueshme kohe dhe energjie, thotë Seewald.

“Ju nuk e vini re se si ata ju harxhojnë kohën, por ky është një faktor stresues për shumë njerëz”.

Prindërit gjithashtu mund të përfitojnë nga thjeshtimi i aktiviteteve të fëmijëve të tyre.

“Ruajtja dhe mbrojtja e energjisë dhe kohës tuaj është më e rëndësishme”.

Një mënyrë që prindërit të gjejnë më shumë kohë për veten e tyre është të kërkojnë ndihmë nga komuniteti, si p.sh. t’i kërkojnë një fqinji të sjellshëm, ose një anëtari të familjes që të shikojë fëmijët e tyre në mënyrë që ata të bëjnë një pushim. Seewald tha se është gjithashtu e rëndësishme që prindërit të mendojnë se çfarë përgjegjësish, të tilla si larja e rrobave ose punë të tjera, mund t’u delegojnë njerëzve të tjerë.

Një pjesë e kohës që prindërit i kushtojnë vetes duhet të përfshijë lidhjen me njerëzit e tjerë personalisht, tha Seewald.

“Shumë prindër ndihen të vetmuar dhe të izoluar. Të shikosh, apo takosh një mik të ndihmon të shprehesh dhe të flasësh për problemet dhe të marrësh mbështetjen emocionale që të nevojitet”.