Zbulimi i një misteri: për ç’shërbente oxhaku i katërt në Titanic?

 

 

Prilli është muaji i një prej tragjedive më të mëdha detare në histori, kur RMS Titanic u mbyt pas përplasjes me një ajsberg, duke marrë me vete 1500 jetë. Ndodhi kjo me datë 15 të këtij muaji të vitit 1912.

Ndërsa rrënojat ende shtrihen në fund të Atlantikut, falë animatorit Jared Owen, ne mund të admirojmë edhe një herë anijen madhështore që lundroi në udhëtimin e saj të parë dhe të fundit 112 vjet më parë.

Owen krijoi një animacion që tregon të 10 kuvertat, duke përfshirë të fundit me varkat e shpëtimit. “Kur ata përfunduan ndërtimin, Titaniku ishte anija më e madhe në botë. Ajo u projektua mbi 100 vjet më parë, pa përdorimin e kompjuterëve apo softuerëve 3D. Gjithçka u bë me dorë, që është një vepër e pabesueshme e inxhinierisë dhe mjeshtërisë.” tha Owen.

 

Animacioni i tij mund të sigurojë njohuri dhe ndihmë për miliarderin australian Clive Palmer, i cili njoftoi rindërtimin e anijes së famshme. “Titanic 2” duhet të përfundojë deri në vitin 2027, me të vetmin ndryshim nga origjinali – sistemet më moderne të navigimit dhe sigurisë.

 

Owen zbuloi gjithashtu sekretet e dizajnit të anijes, duke përfshirë historinë e famshme të oxhakut të katërt me majë të zezë. Ai pretendon se ndërtuesit besonin se Titanic do të “dukej më i fuqishëm” me katër oxhaqe, edhe pse oxhaku i katërt ishte vetëm për, besoni apo jo, ventilim.

Është e rëndësishme të theksohet kuptimi i shkurtesës “RMS”, të cilën pak njerëz e dinë. Titanic ishte “Royal Mail Ship” (Anija e Postës Mbretërore) dhe përdorej për të transportuar postë dhe paketa.

 

Sipas Muzeut Smithsonian, në anije kishte midis gjashtë dhe nëntë milionë artikuj të destinuar për në New York. Fatkeqësisht, e gjithë posta humbi kur anija u fundos më 15 prill, dy orë e 40 minuta pasi goditi një ajsberg.