​A e dini pse qentë hanë bar? Jo sepse janë të sëmurë

Nëse e keni pyetur ndonjëherë dikë pse qentë hanë bar, përgjigjja ka shumë të ngjarë të jetë sepse ata ndjehen të sëmurë.

Edhe pse qentë nuk mund ta tretin celulozën fare, ata shpesh hanë bar në shëtitje. Është një mendim i zakonshëm që ata e bëjnë këtë kur janë të sëmurë, kështu që ata duan ta detyrojnë veten të vjellë për ta bërë më të lehtë për veten e tyre. Por, me sa duket, nuk është kështu.

Një studim zbuloi se 79 për qind e qenve kishin ngrënë bar gjatë jetës së tyre. Edhe pse kjo është një përqindje mjaft e lartë, vetëm 9% e qenve ishin të sëmurë para se të hanin bar, dhe vetëm 22% e tyre vjellën më pas. Të gjithë të tjerët hëngrën bar dhe vazhduan ditën e tyre, të shëndetshëm dhe të lumtur. Kjo sugjeron që bari hahet për arsye të tjera.

A kënaqen qentë duke ngrënë bar?

Ndonjëherë përgjigja më e thjeshtë është më e sakta. Ne kurrë nuk mund ta kuptojmë plotësisht këtë sjellje të qenit, por aktualisht përgjigjja më e popullarizuar në mesin e studiuesve është se qentë hanë bar sepse ata thjesht kënaqen me të dhe pëlqejnë shijen.

Pronarët e qenve kanë vënë re gjithashtu se qentë hanë pjesën më të madhe të barit në pranverë, kështu që është e mundur që të ketë një shije të veçantë të barit të ri. Edhe pse shumë mendojnë se qentë, si macet, janë mishngrënës, ata në të vërtetë janë të gjithëngrënës dhe plotësojnë pjesërisht nevojat e tyre të përditshme për lëndë ushqyese duke ngrënë bimë.

Hulumtimet kanë treguar gjithashtu se bimët dhe manaferrat janë pjesë e dietës edhe tek ujqërit, dhe bari është gjithashtu një burim i shkëlqyer i fibrave, të cilët lehtë mund të mungojnë në ushqimin e qenve. Prandaj, ngrënia e barit mund të ndihmojë sistemin e tretjes dhe gjithashtu zëvendëson një pjesë kryesore të dietës, shkruan IFL Science.