A na ndalon vërtetë zemra kur teshtijmë? Zbulojeni tani çfarë ndodh me trupin tonë!

Kur dëgjojmë dikë të teshtijë, natyrshëm na vjen të themi shëndet, një shprehi kjo me të cilën jemi rritur dhe na duket mungesë edukate nëse nuk e përdorim. Në shumë vende të botës, përdoret e njëjta shprehje në gjuhët përkatëse. Disa prej kulturave besojnë se nëse nuk thua ‘shëndet’ kur dikush teshtin, zemra e tij do pushojë. Sado e çuditshme duket, ka shumë që e besojnë.

Por çfarë ndodh vërtetë kur teshtijmë?

Teshtima duhet menduar si një mekanizëm mbrojtës. Sipas ‘Woman’s Health’, një kardiolog i njohur tregon se në gjuhën e mjeksisë ky veprim është instiktiv dhe ka si funksion pastrimin e hundës nga pluhurat dhe mbetjet. Me pak fjalë, kur hunda juaj irritohet, ju mbyllni sytë, merrni frymë thellë dhe muskujt e gjoksit tuaj shtyjnë ajrin jashtë mushkërive me shpejtësi të lartë duke nxjerrë jashtë gjithçka trupit i duket e tepërt.

Po ç’lidhje ka zemra në këtë mes?

Ky është një nga mitet e shumta që kanë vetëm një grimcë të vërtete brenda. Duke marrë parasysh pozicionin e zemrës që është shumë pranë mushkërive, kur merrni një frymë të thellë mund të aktivizoni një nerv të quajtur ‘vagus’. Ky nerv i jep sinjal zemrës të ulë ritmin e rrahjeve, duke na krijuar përshtypjen se zemra jonë ndalon. Edhe nëse kjo gjë ndodh, pra zemra ngadalësohet për 1 sekondë ky nuk është problem, kështu që qetësohuni.