Sa është e dëmshme ta pini ujin që ka qëndruar gjatë natës

 

Lënia e një gote me ujë në tavolinën pranë shtratit, është një praktikë relativisht e shpeshtë. Nëse zgjoheni të etur në mes të natës ose në mëngjes, do të jeni mirënjohës për lëngjet lehtë të disponueshme. Por, a është vërtet e mirë kjo praktikë për shëndetin tuaj?

Edhe pse uji nuk ka një datë skadence dhe nuk mund të prishet domosdoshmërisht, duhet të mendoni dy herë përpara se të vendosni të pini ujin që ka qëndruar gjatë natës në tavolinën tuaj. Siç transmeton LiveStrong, toksikologia Kelly Johnson Arbor nga National Capital Poison Center ka treguar se çfarë mund të ndodhë nëse pini ujë që “ka qëndruar gjatë natës”.

Mund të kontaminohet

Pa një kapak, ndotësit mund të hyjnë në gotën tuaj me ujë. Gota e hapur është e ndjeshme ndaj ndotjes nga pluhuri dhe insektet. Edhe pse – sipas Mayo Clinic – trupi juaj i tret insektet ashtu si çdo ushqim tjetër, shumë njerëz nuk do të jenë të lumtur të dëgjojnë se në fakt të pish një gotë ujë gjatë natës nënkupton edhe gëlltitjen e ndonjë insekti.

Megjithatë, hulumtimet tregojnë se kimikatet toksike mund të gjenden në pluhurin e shtëpisë dhe me kalimin e kohës, marrja e sasive të mëdha lidhet me probleme shëndetësore.

Mund të ketë shije të hidhur

Nëse keni pirë ndonjëherë një gotë ujë që ju ka mbetur gjatë natës, mund të keni vënë re një ndryshim të lehtë në shije. Kjo është për shkak se kur lini një gotë ujë jashtë gjatë natës, gazrat në ajër duke përfshirë dyoksidin e karbonit treten në ujë. Kështu, dyoksidi i karbonit shndërrohet në acid karbonik dhe uji bëhet i hidhur.

Mund të përmbajë baktere

Sipas NIH, ka rreth 700 lloje mikrobesh në gojën tonë dhe pirja nga e njëjta gotë do të rezultojë në shpëlarje, që do të thotë se uji do të përzihet me bakteret në gojën tuaj përpara se të kthehen në gotë.

Edhe pse bakteret tona nuk kanë gjasa të shkaktojnë ndonjë efekt negativ nëse ripërdorim një shishe uji ose një gotë pasi e lëmë gjatë natës, por ato mikrobe mund të jenë të dëmshme për njerëzit tjerë.

Pra, sa e keqe është vërtet të pish ujë që ka qëndruar gjatë natës

Pirja e ujit që ka qenë jashtë gjatë natës në përgjithësi ndryshon shijen, por jo sigurinë e ujit. Gjërat që mund t’ju duken të gërditshme mund të përfundojnë në gotën tuaj, si insektet dhe pluhuri, por ato ndoshta janë të padëmshme.

“Në përgjithësi, megjithëse uji mund të mos ketë shije aq të mirë nëse e lini gjatë natës, nuk ka gjasa që dikush të sëmuret. Në përgjithësi është e sigurt të pini ujë që ka mbetur gjatë natës për sa kohë që nuk ka ndotje të dukshme të ujit”, sqaron doktoresha Johnson Arbor.