Europa ndryshon karikuesët: Ja cilin lloj duhet të kenë të gjithë telefonat dhe tabletët

Bashkimi Europian ra dakord që të gjithë telefonat celularë dhe tabletët duhet të kenë një karikues të përbashkët, atë të llojit USB-C.

Në shtator të vitit 2021, Komisioni Europian propozoi që të gjithë prodhuesit e pajisjeve telefonike, tabletave, kamerave, kufjeve etj., të krijojnë një karikues universal me qëllim zvogëlimin e mbeturinave, duke inkurajuar konsumatorët të ripërdorin karikuesit ekzistues kur blejnë një pajisje të re.

Sipas Komisionit Europian, qytetarët e BE-së zotërojnë mesatarisht tre karikues të telefonave celularë, por 38% e konsumatorëve nuk kanë qenë në gjendje të karikojnë telefonin e tyre të paktën në një rast sepse nuk kishin karikuesin e duhur në dorë.

“Deri në vjeshtën e vitit 2024, USB Type-C do të bëhet një karikues i zakonshëm për të gjithë telefonat celularë, tabletët dhe kamerat në BE,” tha Parlamenti Europian në një deklaratë.

Ky vendim me siguri nuk është mirëpritur nga Apple, kompani që përdor portën e vet të karikimit, llojin “Lightning”. Kur u propozua për herë të parë, Apple u shpreh se do të vazhdojë “të angazhohet me palët e interesuara për të ndihmuar në gjetjen e një zgjidhjeje që mbron interesin e konsumatorit”, por theksoi se se “është e shqetësuar se rregullorja e rreptë do të ndikojë te inovacioni, në vend që ta inkurajojë atë,” gjë e cila “do të dëmtojë konsumatorët në Europë dhe në mbarë botën.”