Shenjat paralajmëruese të atakut kardiak

Është më mirë të parandalosh sesa të kurosh, një rregull që vlen për të gjitha sëmundjet dhe veçanërisht për ato që manifestohen me simptoma të vështira siç është ataku në zemër. Një muaj ose më pak para një ataku kardiak, trupi dërgon disa shenja paralajmëruese, për të cilat duhet të keni parasysh për të marrë masat e duhura dhe për të larguar rrezikun.

Dhimbje gjoksi

Manifestohet në forma dhe intensitet të ndryshëm tek meshkujt dhe femrat. Për meshkujt është simptoma më e rëndësishme e hershme e një ataku kardiak të afërt dhe nuk duhet të injorohet. Përkundrazi, prek vetëm 30% të grave. Dhimbja e gjoksit mund të shtrihet në njërin ose të dy krahët (më së shpeshti krahun e majtë, nofullën e poshtme, qafën, shpatullat ose stomakun. Mund të jetë e përhershme ose e përkohshme.

Djersitja e tepërt

Djersitja e pazakontë ose e tepërt është një simptomë e hershme e një ataku kardiak. Mund të ndodhë në çdo kohë të ditës ose natës. Më së shumti prek femrat dhe shpesh ngatërrohet me djersitjet gjatë natës gjatë menopauzës.

Rrahje të parregullta të zemrës

Aritmitë shpesh shoqërohen me sulme paniku dhe ankth, veçanërisht te femrat. Ato shfaqen papritur dhe marrin formën e rrahjeve të çrregullta të zemrës ose takikardisë. Ushtrimi gjithashtu mund të rrisë rrahjet e zemrës, veçanërisht te njerëzit me aterosklerozë. Simptoma zgjat rreth 1-2 minuta. Nëse nuk qetësohet dhe ndiheni të trullosur dhe shumë të lodhur, telefononi menjëherë një mjek.

Rënia e flokëve

Është një tjetër tregues i dukshëm i rrezikut të sëmundjeve të zemrës. Më së shpeshti prek meshkujt mbi 50 vjeç, por mund të ndodhë edhe te femrat. Rënia e flokëve shoqërohet gjithashtu me nivele të larta të kortizolit në trup. Kushtojini vëmendje rënies së flokëve në majë të kokës.

Frymëmarrje e shkurtër

Ndodh shpesh si te meshkujt ashtu edhe te femrat dhe fillon qysh gjashtë muaj para një ataku kardiak. Zakonisht është një shenjë paralajmëruese e një sëmundjeje. Personi nuk mund të marrë mjaftueshëm ajër, ndjen trullosje dhe gulçim.

Pagjumësia

Një tjetër simptomë e lidhur me një rrezik të shtuar të atakut në zemër ose goditjes në tru dhe është më e zakonshme tek gratë. Personi është në ankth, ka vështirësi për të fjetur dhe ka zgjime të shpeshta.

Dhimbje barku

Dhimbja e barkut, vjellja, fryrja dhe parehatia janë simptoma të zakonshme të sulmit në zemër si te meshkujt ashtu edhe te femrat. Dhimbjet e barkut para sulmit në zemër janë të natyrës episodike, relaksohen dhe kthehen për periudha të shkurtra kohore. Ushtrimi mund t’i përkeqësojë dhimbjet e stomakut.

Lodhja

Lodhja e pazakontë është një nga simptomat kryesore të një ataku të afërt në zemër, veçanërisht tek gratë. Lodhja nuk është për shkak të aktivitetit fizik apo mendor dhe arrin kulmin në fund të ditës. Është simptoma më e dukshme dhe vështirë se kalon pa u vënë re, pasi personi nuk mund të kryejë funksione bazë, si të bëjë dush ose të rregullojë shtratin.