Bill Gates parashikon se si do të sillet Covid pas variantit Omicron

Omicron, varianti i fundit i shfaqur dhe i cilësuar nga Organizata Botërore e Shëndetësisë (OBSH) si “shqetësues”, në një kohë të shkurtër ka arritur të përhapet në dhjetëra vende të botës.

Me një kapacitet infektiviteti shumë më të lartë se paraardhësit e tij, infeksionet janë rritur ndjeshëm. Megjithatë, kjo rritje e pakontrolluar e infeksioneve mund të ketë një pasojë pozitive për të ardhmen e pandemisë, siç kanë njoftuar më parë disa ekspertë në lidhje me ashpërsinë më të vogël të shkaktuar nga Omicron.

Bill Gates, një nga zërat më aktivë që nga fillimi i pandemisë, gjithashtu qëndron në këtë linjë.

“Ndërsa vendet përjetojnë valën e Omicron, sistemet shëndetësore do të preken. Shumica e rasteve të rënda do të jenë njerëz të pavaksinuar. Sapo Omicron të kalojë nëpër një vend, pjesa tjetër e vitit duhet të ketë shumë më pak raste, kështu që COVID mund të trajtohet më shumë si një grip sezonal”, tha ai.

Bashkëthemeluesi i Microsoft është shprehur gjatë një bisede në rrjetet sociale me Devi Sridhar, drejtor i Global Health Governance dhe profesor në Fakultetin e Mjekësisë në Universitetin e Edinburgut, se vaksinat “parandalojnë shumë mirë rastet e rënda dhe vdekjet, por u mungojnë dy gjëra kyçe: nuk ndalojnë infektimin dhe janë të kufizuara në kohë sa i përket imunitetit që japin”.

Por, çfarë do të vijë pas Omicron? Sipas Gates, është e pamundur që të shfaqet një variant i ri që është më i transmetueshëm se Omicron.

“Por, virusi na ka befasuar shumë në këtë pandemi”, paralajmëron ai.

Milionat e infeksioneve të këtij varianti do të gjenerojnë shumë imunitet natyror gjatë vitit të ardhshëm, pavarësisht kësaj, Bill Gates beson se “mund të na duhet të vaksinohemi çdo vit kundër COVID për ca kohë”.