Cila është ngjyra më e preferuar në botë dhe pse

Si pjesë e një studimi mbi normat gjinore në vitin 2012, sociologu i University of Maryland, Philip Cohen, u bëri gati 2,000 burrave dhe grave një pyetje të thjeshtë: “Cila është ngjyra juaj e preferuar?”. Bluja rezultoi më e preferuar, e ndjekur nga jeshilja për burrat dhe lejlaja për gratë.

Një tjetër sondazh i YouGov i kryer në vitin 2015 në 10 vende në të katër kontinentet tregoi se bluja është më e preferuara në të gjithë botën. Ne vend të dytë u renditën jeshilja, e kuqja dhe lejlaja (në varësi të vendit). Madje ngjyra blu ishte më e preferuar edhe në Kinë, ku ngjyrat si e kuqja, e verdha dhe jeshilja konsiderohen si fatsjellëse.

Bluja ka tendencën të jetë më e popullarizuar tek burrat sesa gratë, mirëpo gratë sërish priren të zgjedhin blunë më shpesh se çdo ngjyrë tjetër. Studimet që në vitet 1940 e kanë theksuar këtë qasje ndaj blusë.

Duket se të gjithë e duan blunë, por pse?

Sipas hulumtimeve të kryer nga psikologët Stephen E. Palmer dhe Karen Schloss viteve të fundit, preferencat tona për ngjyrat lidhen me objektet që shoqërojnë ngjyrën. Për shembull, prirja ndaj ngjyrës portokalli varet edhe nga sa i pëlqeni kungujt; ose prirja ndaj jeshiles varet nga raporti që keni me barin apo brokolin.

“Rezulton, nëse shikoni të gjitha gjërat që lidhen me blunë, se ato janë kryesisht pozitive”, shpjegon Schloss. “Rrallëherë mund të mendosh për gjëra negative në ngjyrë blu.”

Ne e shoqërojmë blunë kryesisht me qiellin dhe ujin, që shoqërohen me ndjesi më pozitive.