Ç’të bësh kur ta lënë ‘seen’?

Tmerri më i madh i ditëve të sotme me romancat moderne është një dhe i vetëm: Të ta lënë “seen”. E shqipëruar, kur dikush të lexon mesazhin dhe nuk kthen përgjigje kurrë, mund të merret si dramë e lidhjeve moderne.

Në një kohë kur shumica e marrëdhënieve e kanë bazën virtuale se komunikimi i tillë e bën çdo gjë më të lehtë, mund të themi se të gjithë e kemi provuar të paktën një herë këtë situatë.

Por çfarë të bësh kur ndodh?

Nëse ta lënë seen për disa orë ose 1 ditë me shumë gjasa po shqetësohesh kot, pasi personi mund të ketë ngarkesa të tjera dhe nuk të ka ty prioritet të momentit. Ndërsa, nëse kanë kaluar disa ditë, mirë është të vazhdosh jetën dhe të mos mendosh më për atë që ka ndodhur.

Kupto para se të dalësh në përfundime me çfarë personi ke të bësh. Mund ta pyesësh për mënyrën si shkëmben zakonisht mesazhet. Mbase do kuptosh se ke të bësh me një person që me zor kthen përgjigje se e ka zakon këtë gjë.

Fol paraprakisht për mënyrën si ti do ta mbash komunikimin. Nëse nuk bini dakord dhe ty të shqetëson mënyra se si personi flet ose shkëmben mesazhe, mbase është momenti të rishohësh raportin.

Nëse ta kanë lënë seen, mund të rishikosh mesazhin e fundit që të kuptosh nëse ka vërtetë nevojë për një përgjigje. Nëse jo, mbase personi po pret t’i shkruash sërish, ose thjesht nuk ka një përgjigje për ty në atë moment.

Trego durim dhe mos rri brenda kokës tënde. E thënë ndryshe, ndalo vrullin për të nxitur veten që të shqetësohesh me situatën dhe të bësh veprime të nxituara si për shembull të shkruash mesazhe nga nxitimi dhe nervat, mesazhe që do ofendojnë personin ose do prishin çdo gjë.