Studimi: Kafshët më shumë i frikësohen njeriut sesa luanit

Një studim i ri, nga Parku Kombëtar Kruger në Afrikën e Jugut, ka zbuluar se të folurit e njeriut është shumë më i frikshëm për kafshët e egra sesa tingujt e luanëve.

Shkencëtarët luajtën regjistrime të njerëzve që thjesht flisnin përmes altoparlantëve. Altoparlantët ishin fshehur brenda gropave në Parkun Kombëtar. Fjalimi njerëzor i dëgjuar nga kafshët e egra përfshinte gjuhë rajonale të folura në Afrikën e Jugut. Rreth 95% e kafshëve ishin jashtëzakonisht të frikësuar dhe ikën me shpejtësi. Në të kundërt, regjistrimet e luanëve që gjëmojnë dhe ulërijnë shkaktuan dukshëm më pak frikë te gjitarët e egër. Në fakt, gjatë eksperimentit me tingujt e luanëve, disa elefantë u përpoqën të sulmonin altoparlantët.

Gjetjet e studimit sugjerojnë se kafshët e egra, të cilat përfshinin antilopat, elefantët, gjirafat, leopardët dhe derrat e egër, kanë mësuar se kontakti me njerëzit është jashtëzakonisht i rrezikshëm për shkak të gjuetisë.

Në këtë kontekst, autorët e studimit theksojnë se kafshët e frikësuara përbëjnë një sfidë për zonat që mbështeten në turizmin e kafshëve të egra, sepse vizitorët që i afrohen pa dashje i trembin. Një nga autoret e studimit, profesoresha Liana Jeanette, i tha BBC-së se kërkimi fokusohet në “ekologjinë e frikës”, një koncept që merret me ndikimin e ndërveprimit midis grabitqarëve (përfshirë njerëzit) dhe gjahut.

“Grabitqarët vrasin prenë dhe kjo padyshim zvogëlon numrin e gjahut, por ajo që kemi treguar në studime të tjera është se frika që frymëzojnë grabitqarët mund të zvogëlojë vetë numrin e gjahut”, tha profesoresha. Megjithatë, gjetjet e hulumtimit mund të ndihmojnë në mbrojtjen e specieve vulnerabël. Për shembull, nëse tingujt e njeriut përdoren siç duhet, ato mund të mbrojnë kafshët nga gjuetia e paligjshme.