Ky ushqim mund të luftojë sëmundjet e rënda dhe vdekjet e hershme, thotë studimi

Përdorimi i vajit të ullirit në vend të margarinës, gjalpit ose yndyrave të tjera të ngopura mund t’ju mbrojë nga vdekja nga kanceri, sëmundjet kardiovaskulare dhe të frymëmarrjes, demenca dhe sëmundje të tjera, sipas një studimi.

“Është një kombinim i uljes së sasisë së yndyrës së ngopur në të njëjtën kohë që po rrit yndyrnat e pangopura që gjenden në vajin e ullirit”, tha për CNN Dr. Howard LeWine, kryeredaktori mjekësor i Harvard Health Publishing, pjesë e Shkollës Mjekësore të Harvardit.

“Shkurtimisht duhet ta përdorni vajin e ullirit sa herë që mundeni si një zëvendësues i yndyrave të ngopura kur jeni duke gatuar ose në salcat e sallatës,” tha LeWine, i cili nuk ishte i përfshirë në studim.

Studimi analizoi dietat e njerëzve të regjistruar në dy studime të mëdha të financuara nga qeveria. Studiuesit më pas krahasuan raportin e dietës me të dhënat e sëmundjeve dhe vdekjeve për ata njerëz me kalimin e kohës.

Burrat dhe gratë që zëvendësuan pak më shumë se 2 lugë çaji (10 gr) margarinë, gjalpë, majonezë ose yndyrë qumështi me të njëjtën sasi vaj ulliri kishin një rrezik të përgjithshëm deri në 34% më të ulët për të vdekur sesa njerëzit që konsumonin pak ose aspak vaj ulliri, sipas autores së studimit Marta Guasch-Ferre, një shkencëtare kërkimore në Harvard.

Njerëzit që raportuan se hanin nivelet më të larta të vajit të ullirit kishin një rrezik 19% më të ulët për të vdekur nga sëmundjet e zemrës, 17% më të ulët për të vdekur nga kanceri, 29% më të ulët për të vdekur nga sëmundjet neurodegjenerative dhe një rrezik 18% më të ulët për të pasur vdekshmëri nga sëmundjet e frymëmarrjes krahasuar me ata që nuk konsumuan kurrë ose rrallë vaj ulliri në vend të yndyrave të ngopura, tha Susanna Larsson, një profesoreshë e asociuar e epidemiologjisë në Institutin Karolinska në Suedi.

Vaji i ullirit është konsideruar gjerësisht si çelësi i suksesit të dietës mesdhetare, dieta më e shëndetshme në botë.